أم البنين اتصيح وين اتريد...يالحادي
بالضعن من جديت...عندي اشبعد خليت
وين اتريد يالحادي

ريض ابهونك وارحم بحالي...من رحت وياك راحت آمالي
وي نواعيك ينعه دلالي...حقي لو أبجي النوح يحلالي
لبجي وأخلي الطير يبجي اوياي...يالحادي
دم ودمع هليت...عندي اشبعد خليت
وين اتريد يالحادي

والده وحقي يكثر اعتابي...قوطروا كلهم وراحوا احبابي
يا مره مثلي انصابت اصوابي...لو عدل يعقوب ناح لمصابي
مو جرح وأرجه يطيب كثره اجروح...يالحادي
تنظر اشما داويت...عندي اشبعد خليت
وين اتريد يالحادي

ودعت وياك أربعه شبان...كل شخص منهم بدر يسطع جان
جان بيتي اينور وللكرم ديوان...يا وسف أصبح مكور الأحزان
تانيني قلبي ايريد يمشي اوياك...يالحادي
إلمن أظل بالبيت...عندي اشبعد خليت
وين اتريد يالحادي

حقي لو أنشد ناوي ظعنك وين...حايره ظليت وأصفج الجفين
قلت فدوه اتروح الولد دون حسين...لو يرد سالم وما يغدره البين
سالم يريته ايعود ظعن حسين...يالحادي
يوم المشه ناديت...عندي اشبعد خليت
وين اتريد يالحادي

عادت الغيّاب مده ويعودون...وآنا غيابي بيا وكت يلفون
جنت أتنطر طارش ايودون...مشوا والأقدار تحدي بالمضعون
لا خبر لا مكتوب منهم جاي...يالحادي
واعله الدرب تانيت...عندي اشبعد خليت
وين اتريد يالحادي

لا تلوموني صحت ياهالناس...القلب من حقه يشيب قبل الراس
يالتنشدوني آنا أم عباس...بالوفه معلوم صاحب النوماس
ما ينسه ذاك إرباي طيب ذات...يالحادي
ايفارقني ما ظنيت...عندي اشبعد خليت
وين اتريد يالحادي