بآخر نفَس عنده...ناسي جرِح چبده
 كل فِكره يم جدّه...البالغاضريّه
 
 _____
 
 جعفر الصادق من دِنَت آجاله
 او من داروْا اعليه اخوِته و اعياله
 اتذكّر مُصاب احسين و ابيا حاله
 ابدال الإبن راسه ابحضن چتّاله
 
 و بآخر انفاسه...چم حافر الداسه
 فوگ الرمح راسه...او جثته رميّه
 
 ______
 
 ذايب دليله من حَرارة سَـمّه
 او ما مهْتِـم ابْحَر چبدته الـمتخـذْمه
 لحسين حزنه او لوعته او كل همّه
 ظامي گظه و الماي يجري يمّه
 
 يبچي او يهل عينه...من يذكر احسينه
 ما بطّل اونينه...لهاي الرزيّه
 
 ______
 
 لـمّن بني هاشم لفت لوْداعه
 خفّت عن الصادق جميع أوجاعه
 چا وين هاشم ما إجت فزّاعه
 للطِحنت اخيول العده أضلاعه
 
 ياهو اللي من أهله...گام او فزع لجله
 فزعت له بس طفله...بنته رقيّه
 
 _____
 
 او من شاهد الكاظم ينوح ابكتره
 نشّف دموعه او گام ضمّه لصدره
 و احسين ياهو الضمّه بآخر عمره
 او ياهو الذي جرِّ السهَم من ظهره
 
 او ياهو الحظر يمه...لـمّن نزف دمّه
 ياويلي ظل جسمه...ابحَرِّ الوطيّه
 
 _____
 
 أصبِر عله الصار او جره ما بيّه
 لو مَر عليّه العاشر او طاريّه
 و ابكربله أعظم مصاب اعليّه
 ليزيد ودّوْا عمّتي مسبيّه
 
 للشام و الكوفه...ودّوها مچتوفه
 او راس الأخو اتشوفه...بيد آل اميّه
 
 _____