هالليله سعاده دائمية...وبالمنتظر دنيانه زهية
هالليله أملنه مولده صار...ومن نوره غدت دنيانه أنوار
والباري علينه حجته اختار...ليه مشبوحه ظلت كل الأنظار
والجيته انتظرنه...يا عزنه وفخرنه
أهلاً بيك نور الجعفرية...وبالمنتظر دنيانه زهية
واشموع الوفه نعلق الدربك...يالكلك حنان وعطف قلبك
يبن الحسن واجب صبح حبك...وبهاي الولاده صرنه جنبك
يا نور الهدايه...يا تاج البرايه
وانت الأمل صرت الهالبريه...وبالمنتظر دنيانه زهية
يالمنتظر ميلادك سعاده...يا نور الجلاله والعباده
تحلالك يمهدينه السياده...العداله إجت لينه ابهالولاده
وبيك احنه ربحنه...وبمولدك صحنه
وهاي أشعارنه الشخصك هديه...وبالمنتظر دنيانه زهية
عدنه عيد بخمطعش شعبان...نور ابن الحسن بأعله الأفق بان
والباري فتح للجنه بيبان...واصطفت الحور اوياها ولدان
واتزف التهاني...ما بين المباني
واتهني الوصي حامي الحميه...وبالمنتظر دنيانه زهية
المهدي مولده ينطينه عبره...اويا يوم اليسهل الله أمره
ربنه صوره صاحب القدره...آخر نور يمته يلوح بدره
ونتهنه بقدومه...حي وهله بيومه
وانعاين أحكامه الجوهريه...وبالمنتظر دنيانه زهية
بميلادك نقدم تهانينه...يبن العسكري وتدري بحجينه
نتنطر ابهاليوم التجينه...ونستر بلقاءك يا ولينه
يوم البيه تظهر...بينه الدنيه تزهر
واتخلصنه من الجاهليه...وبالمنتظر دنيانه زهية
يبن الحسن متفرق جمعنه...وانت تعلم وتدري بوضعنه
من ديرة علي جدك طلعنه...وصار اسنين ليها ما رجعنه
واتفرق شملنه...وأبعدنه من أهلنه
وعندك واضحه هاي القضية...وبالمنتظر دنيانه زهية
يالحجه نحلفك بالصميده...هذا الشمل يم حيدر تعيده
وتصبح شيعتك كلها سعيده...واتحقق الغايتنه الوحيده
والجدك نزوره...ونشتم من عطوره
وبينه تزدهر ذيج الثنية...وبالمنتظر دنيانه زهية
