ميلاد العباس...للعالم نبراس
سجل تاريخ وعنوان...يوم الرابع من شعبان
من روضة الحب والفرح هبّت نسايم
جو المسره اتوضحت هاي العلايم
من مطلع البهجة انولد بدر الهواشم
وبنور وجهه اتنورت كل العوالم
من حيدر هالنور...للعباس اتدور
نور ولّوح للأكوان...يوم الرابع من شعبان
شعبان يحمل يا وصف يعجز لساني
شهر السعاده والفرح شهر الأماني
سحر القوافي الزاهره ايوضح بياني
وبشعري أبعث للوصي أزكه الأماني
انقدم للكرار...اكليل الأشعار
انرددها بأعذب ألحان...يوم الرابع من شعبان
يوم الشدد حيدر أسد واضح ثباته
والأسد لو خلف شبل يحمل صفاته
أم البنين الأنجبت زهرة حياته
بهاي الولاده حققت كل أمنياته
حيدر بالأمثال...والد للأشبال
واتصدق هذا البرهان...يوم الرابع من شعبان
حين انولد بدر الوفه وهلّت أنواره
بالفرحه زفوا للوصي هاي البشاره
حيدر قصد صوب المهد يشبح انظاره
وانحنه ايقبل يمنته وقبّل يساره
و من بعد الجفين...قبّل منه العين
حيدر بالمولد فرحان...يوم الرابع من شعبان
هاشم اللليله اتفتحت زهرة ثمرها
وفرحة بني عَمر العُله بمطلع بدرها
بروح الأماني الصادقه نالت وطرها
من حيث هالليله انولد كوكب ظفرها
وبجو الأفراح...نور الكوكب لاح
ايوضح آيات الإحسان...يوم الرابع من شعبان
