على هونك يقلبي اشبيك زعلان...يجي يوم ويجيك العنك ابعيد
ماريدك تون ودوم حزنان...اشما طال الحزن لازم يجي العيد
ارمي اثياب همك وإلبس ألوان...مثل لون الورد ليل المواعيد
غرد كالبلابل بين الأغصان...عله اشفاف العشق تحله التغاريد
نشيد أهل الهوه مارايد ألحان...سكتات اليحب أجمل أناشيد
يقلبي شيبت والعمر خلصان...بيّن عالوجه رسم التجاعيد
متعيش الفراشه بغير بستان...وما تشفه الجروح ابغير تضميد
إذا صادك شبج لا تبقه حيران...تره الينصاد هم يتعلم ايصيد
إذا يمك نهر لا تبقه عطشان...ولو مرات صعبه مدت الإيد
أبشرك يا قلب هل شهر شعبان...هل شهر العفو وشهر المواليد
إفرح يا قلب وي سيد الأكوان...و يشارك بالفرح شيريد
الما يفرح يقلبي اليوم خسران...ما طاح المطر بس ضحكت البيد
فرحانه يقلبي الإنس والجان...بمواليد الأيمه يا فرح زيد
الفرح ويه الرسول وعلي ربحان...عده العتره يقلبي محد ايفيد
تعال الكربله وما ترد ندمان...إجو اهل الكساء بليلة العيد
أريد أسمع وين ما كان...ابصلاتك عالنبي تحله المواليد