يگضن محرم وصفر بس تبگه كل عين...تنتظرك وتحسب سنه يالغالي يحسين
أيام تخلص بس تظل اجروح الأيام...واليوفي عشرت خدمتك بس هذا خدام
من المدينه الأربعينك كربله وشام...أحاه يمصاب الفجع بأحزانه دارين
تنتظرك وتحسب سنه يالغالي يحسين
ما نشفت الدمعه بعد يا أغله محبوب...حته عله المشاية تبدي اعيون الدروب
والحسرة ظلت يا حسين بكل الگلوب...شهرين مرن عالمحب بس چنها يومين
تنتظرك وتحسب سنه يالغالي يحسين
مرت سريعة وما شبع نوح الموالي...تدري انت غالي واليحبك دمعه غالي
يرخص إلك إي والذي عالرمح عالي...لو بيده يبچي اويه الدموع اعيونه الثنين
تنتظرك وتحسب سنه يالغالي يحسين
لا يوم يشبه يومك اشما مرت أحزان...للدمعه عاشورك صفه يحسين عنوان
كل قلب بعده المجلسك من هسه لهفان...وايقول لحظه بمجلسك تتحصل امنين
تنتظرك وتحسب سنه يالغالي يحسين
كل ذكره يكتبها الحزن بكتاب الدموع...صارت الحبك ترجمه للگلبه مفجوع
والبعده يلطم من أهل ما چان ممنوع...يشتاگ ليام الحزن يحسين مرتين
تنتظرك وتحسب سنه يالغالي يحسين
والخادم ايقدم إلك روحه هديه...شهرين يطلب نظرة الزهره الزجيه
أسأل الباري اليرضه من ترضه عليه...ترضه القليل العندي ريت وأوفي بالدين
تنتظرك وتحسب سنه يالغالي يحسين
وياك يبن المرتضه خطيته عهدي...سمعاً وطاعه يا إمامي هذا ردي
يا ربي عجل طلعت القائم المهدي...وينه وسؤالي بالدمع لمن قلت وين
تنتظرك وتحسب سنه يالغالي يحسين
