طيف منك لو تشاهد عيني...أرد أقله الكربله وديني
 
ياللي صارت شوفتك بس بالحلم...بيش أشد الحيل لمن ينهدم
حسرتي عالخد مدامع تنرسم...والهجر ياوالدي ياذيني

ياللي خذت الروح وياك ورحت...ابغير اسمك يا حبيبي ما صحت
بويه شيبني البعد قد ما نحت...نار هجرك بالقلب تجويني

تسعر النار وجمر مدمع العين...انت تدري اشقد أحبك يا حسين
وين جاوبني رحت يا بويه وين...اتيتمت عقبك يغالي اسنيني

اسنيني حزنانه يبويه و أنتظر...علّمت حته الصبر معنه الصبر
يا هو يوصل كربله انطيه العمر...فدوه يا من شوفتك تحييني

اهواي مشتاقه إلك يا والدي...يبدي ليلي وحسرتي بيه تبتدي
بويه وبروحي القدومك أفتدي...ما أظنك يالأبو ناسيني

روحي يعيوني عليك امعلمه...لا هو طبعك تنسه بنتك فاطمه
دمعتي ياوالدي سالت دمه...أنتظر يا مهجتي اتوافيني