ألأم المفجوعه
«حدي»
يا حي شباب الغانمه...عريس جاسم زفته
جاسم زهر مثل الگمر...يتبختر إبين إخوته
* * *
رمله إطلعت من الخدر...تهلي الدمع ومهلهله
متخلي گلبي مبتشر...يبني أشوفن كربله
من الـدهر صرت إبخطر...شبگت ولدها ونادته
* * *
يالبيك ما ضاع الربه...إو در الشربته يولدي
ولن خامس أصحـاب العبه...ناده يرمله هوّدي
دمعچ يهل وإبنچ عدل...لاحت لي نادت فرگته
* * *
رمله الولدها إتهيأت...العرسـه إو بگت تتمثله
إو زينب الكبره هلهلت...نادت إبدمعه هامله
إبدمع اليهل آنه أعجن إلـ...ـعرس إبن أخويه حنته
* * *
إو عالمهر جسام إعتله...مدرع إبچفه إمهنده
يا عمي عرسي أجّله...خل أشفي گلبي من العـده
شنهو العرس عندي ونس...للحرب طبّت ساحته
* * *
للسيف أسلم رگبتك...وإنته وديعة والدك
وصاني عودي إبنصرتك...وإضخرني سيف الساعدك
إبضيج ألأمر نفع الضخر...دوك إخذ هاي إوصيته
* * *
غط جاسم إبگلب الحرب...وألأجل حـاول مصرعه
رفرف من حسين الگلب...للقاسم إو فگده أفجعه
عگب الظفر سيف الكدر...للجنه أرشد نيته
* * *
نايم عله وجه الثره...وإمخضب إبفيض الدمه
للخيم وجه ناظره...إو ناده يابن حامي الحمه
جاسم گضه إصوابه مضه...والخيل رضت جثته
* * *
للقاسم حسين إعتنه...شافه ودمـع عينه جره
دناه الصدره وإحضنه...وشم الوديعه إبمنحره
يومك صعب ناره تشب...وإبگلب عمك جمرته
* * *
شاله إوسدر بي للخيم...وأحنه إعله جاسم گامته
وإتلت حسين الحرم...ناداها كُفّي إمنصته
إبفيض الدمع طفي الشمع...جاسم وإغلگي حوفته
* * *
رمله إعله إبنها إتودعه...طـاحت إو محنيه الضلع
شنهالمصيبه الفاجعه...نادت إبگلبٍ منفجه
العريس إجه ما بي رجه...وإمحنه من دم رگبته
* * *
