فزع جاسم العمّه إو شد عله النيبه...من شاف الفواطم صارت إبريبه
* * *
إسم الله إعله الشباب الفازع إلعمه...إو لخدور الفواطم ما يعز دمه
إمعرب بالأنساب إو صافي دُر أمه...وإيجيب الفته إعله الطيب تعريبه
* * *
شد بألله العزم والعزم منه إيفوح...إو لن رمله تنادي إهنا يبعد الروح
عني إتروح يبني إو فرد روحه إتروح...لو غيبة وكت وأصبر عله الغيبه
* * *
ناداها اليريد الشرف ما يهتم...يموت إعله الوفه لو بالوفه يسلم
إو شباب الغانمه بالسيف يتغنم...لو خضب جبيله إبدم أصاويبه
* * *
دنت يمه تودعه إو تنسل إجعوده...شمامة سعدها إو تشم بخدوده
عفيه إبني اليذب لحسين مجهوده...بإسم الدين وإيلبي مطاليبه
* * *
فرحة حزن فرحت والدمع سچاب...إو من گوس الوداع إيصيبها النشاب
تگله العيش لمّك يولدي لو طاب...تراهي إبشوفتك لذة مطاييبه
* * *
لا تبچين لبنچ هلهلي يمّي...شنهو العرس والحنه عگب عمي
إمعرس عالمنايه إو حنتي دمي...إو عرس الموت دم الموت تخضيبه
* * *
زر درعه إو گلبها إعليه يتگلب...إو زرد فوگ الزرد من عينها ينصب
إو تگله إمن الطعن لو گلبك إتعطب...جدامك الكوثر يطفي تعطيبه
* * *
جدمتله المهر وإتخيل إو ضهضب...إو لعب ما يلعب الكرار بالملعب
لو چان الفرع من أصله إمدرب...يرسم بالحرايب صور تدريبه
* * *
نخت رمله إبگلبها إو سدر وإتوصيه...يگلبي إلحگ عزيزك وحده لتخليه
إو لو شفت الطعن والطبر يكثر بيه...موت إو يالشباب إو عِلمه لتجيبه
* * *
لحگ جاسم گلب رمله إو يذب عنه...وإسهام الزمن جاسم يصيبنه
وإبدم الشهاده جاسم إتحنه...إو گلب رمله الدهر كضه إبمخاليبه
* * *