عريس جاسم علگو إبصيوانه...شمعة شبابه
لحسين ورده وللحسن ريحانه...شمعة شبابه
* * *
رمله إبخدرها إمهلهله ومسروره...إبزفة ولدها
من تنظر الجاسم يهلهل نوره...يفرح چبدها
وشگر الـذوايب عالمتن منشوره...چوچب سعدها
شبگت ولدها وشمته وفرحانه...بشمعة شبابه
* * *
عريس جاسم وإخوته إيزفونه...چالبدر يزهـر
وحسين راد إبعرس نور إعيونه...دلاله يستر
جاسم گضه وظل بالگلب چانونه...نيرانه تسعر
بالدم تحنه وخمدو عدوانه...شمعة شبابه
* * *
إبجاسم غـدر سهم الگدر وإگصوره...وبالدم تحنه
ورمله إبفگد عزها بت مكسوره...تجذب الونه
وإمكدره وإمحسره ومجموره...إبفگد المچنه
ظلت توِّج إبحسرته ونيرانه...شمعة شبابه
* * *
عريس وثياب العرس تحلاله...وبيها إيتبختر
وكل هاشمي إبجاسم فـرح دلاله...العرس المشكر
يا حيف وافاه بسهم چتاله...گوس المگدر
يا وسفتي وما أزهت الخوانه...شمعة شبابه
* * *
بصوت الحزن رمله تون وتنادي...يبني أفجعتني
يا سلوتي يا ضيعتي إبهالوادي...يالضيعتني
يا چبدتي ويا مهجة إلبفّادي...ليش إتركتني
ياشاب يالخمدت گبل ميحانه...شمعة شبابه
* * *
رمله إعله جاسم ظلت إتجـر ونه...وتسب العبره
عريس يبني وبالعرس متهنه...ومنگطع نحره
وليلة زفافه من دماه إتحنه...وحوفته الغبره
ومغيَّره إبذاري الثره وتربانه...شمعة شبابه
* * *
برباك يبني ذاب شحم إعيوني...إو ردتـك إمچنه
ما چان ظني إبكربله إيفجعوني...وأگطع الظنه
شعتذر عگبك يبني لو نشدوني...إبنچ تهنه
بعرسه وزفافه وحنته وديوانه...شمعة شبابه
* * *
ظنيت يوليدي تهيل إترابي...وتحزن علي
ما چان وادي كربله بحسابي...وهاي الرزيه
يا حسرتي ويا كسرتي وإصـوابي...بالغاضـريه
مني إنفگد نعم الولد وإحسانه...شمعة شبابه
* * *
