هجرك فتّاك...وانت بفرقاك
يبن الزهراء...ذابحني هواك
يا بو ثغر مرسوم اقحواني...يمخلي خد الكمره ارجواني
شوقي إلك رجع لي عنفواني...نفس الوقت جمر البعد جواني
بُعدك ذباّح...بكترك أرتاح
كل عمري سؤال...يا يوم ألقاك
غايب نعم بس أشعر انت حاضر...هذا الحضور الكحلة بالنواظر
حاضر وأشوفك ساكن الضماير...حاضر فقط عندَ ذَوي البصائر
يالشع وبان...بنص من شعبان
سبحان الله...من نوره انطاك
حسنك وجب يتبرقع بنقابه...مثل الشمس لو لاذت بسحابه
يا سيف ربنه الما نزع كرابه...يمته عددكم يكتمل نصابه
جيشك منعوت...يشبه طالوت
اثلثمية سيف...وي جيشك ذاك
متشوفك العين القلب يشوفك...يالجنك الكعبه وإجيت اطوفك
يمه تجينه وتحشد بصفوفك...وهناك اصيرن سيف من سيوفك
ابجرت السيوف...جربنه وشوف
لو صار الصار...خلنه بيمناك
تبارك الله بحكمته تبارك...الخلاني أعيش وبيه تسري نارك
ميضرني لو طول عليّ انتظارك...أفضل أعمال الأمة انتظارك
ما همنه الغير...يا وجه الخير
اشما تحجي الناس...هم نبقه اوياك
اسنينك ألف وأكثر وآنه أنطرك...أكثر أريد يطول الله عمرك
وأدعي من الباري يسهل أمرك...ينطيك رخصه تظهر وينصرك
يا آخر نور...سيفك منصور
يا يوم انشوف...لو رف إلواك
