لهفي على الإمام المسموم
«تجليبه»
بألله إهنا يدفان الگضه مسموم...جرح الساگ ناشف لو يفيض إدموم
* * *
بألله إهنا يدفان الغريب الچان ...من سجن السجن كل يوم إله سجان
وإبگلبه السلاسل وجرت نيران...إو من شم الهوه إو من الضوه مجروم
* * *
من شم الهوه محروم عاش إو مات...وأيامه إنگضت بالآه والحسرات
شده إبأثر شده إو أصعب الشدات...من سطرة السندي إمكدر إو مالوم
* * *
آ يا سطرة السندي إو مصيبتها ...إبوجه الكاظم إو ظلت علامتها
اليوم الحشر بألإسلام جمرتها...تشب إو تنطفي إو تسعر إلهذا اليوم
* * *
تشب إو تنطفي بگلوبنه إو تسعر...مثل گلب الغريب الذاب وتفطر
إو من جرح السلاسل دمه يتفجر...إو من عيني الدمع فوگ الوجن مسجوم
* * *
مسجوم الدمع لاچن ميطفي النار...من إگلوبنه إو سم الدهر فجار
گطع چبدة الكاظم غريب الدار...إو گلب الدين يتگطع عله المظلوم
* * *
مظلوم إنچتل عود الرضه مسجون...إو نعشه إعله الجسر متحير إو مرهون
عالإسلام يصعب هالأمر ميهون...إو خله إعيونه ما نستلذ بالنوم
* * *
