جرّد صارمه العباس --- بيمينه اورگه احصانه
وإجه لحسين يترخّص --- يريد الحرب عدوانه
-----------------
إوچب يم ابو اليمه --- والرايه ترف بيده
يخويه أيـگلّه رخصني --- احارب والحرب عيده
وابو اليمه يصبر اعليه --- اليوم العاشر ايريده
وهوّه يجلب الونّه ويتصوّر عطش سكنه عليه صارت أشد محنه
ميدري يمتثل لحسين --- يو سكنه العطشانه
................
يتصوّر عطش سكنه --- اوشكواها من اجت يمّه
وإهو بالماي واعدها --- يجيبه صاحب الهمّه
ما يـگدر يخالفها --- ولا يعصي ابو اليمه
صار ابمشكله اوحيره صعب ميهون تدبيره راعي الشييم والغيره
گام ايحوس روح ابروح --- لمن دمعت اجفانه
........................

من شافه ابو اليمه --- موچب يهل دمع العين
ناداه اوجذب حسره --- لوين اتريد گلّي وين
يـگله اعليك مايخفه --- الحال من الحرم يحسين
تدري بالعطش ضرها چبود الحرم فسّرها العطش والوان غيرها
واجت سنه تحشمني --- يعمي العطش آذانه
........................
وآنه واعدت سكنه --- ابعزم الله اجيب الماي
من اسمعت شكواها --- يعمي العطش فت احشاي
وتدري امدلّه سكنه --- عندي ياضوه عيناي
اوما أگدر أخالفها اورزايه العطش عارفها روحي اليوم لتلفها
والبي دعوة اسكينه --- ابوجودي اوتضل لهفانه
....................
من شافه ابو اليمه --- متهيج اونيته هاي
رخصه انطاه يجيب الماي --- اوكل العسكر اعله الماي
حمل عالـگوم ودعاها --- مذهوله بلايه راي
اوخلّه الجيش كله يلوج ورد الخيل كلها امروج تسبح بالدمه وتفوج
ضنوة حيدر الكرار --- واشب بالحرب نيرانه
....................
نار الحرب سعّرها --- او سعّر بالـگلوب النار
او ذكّرها ابدر وحنين --- وبحملات حامي الجار
ركز عالمشرعه الرايه --- ودعه لجيوشها طشار
وخاض الماي بيمينه اوتذكّر چبدة اسكينه عطشها وأدمعت عينه
رمه الماي او مله جوده --- أبي والمكرمه شانه
.....................

سدّر للخيم بالجود --- راعي المكرمه والجود
وداعي الحرب صاح العود --- اوكل الجيش رد اردود
عله راعي الفخر والزود --- سبعين الف بيها اوزود
صرخ بيها اوطشرها ابخطة موت حيرها الزلم عالخيل كوّرها
اوخلّه حومة الميدان --- بس لحصانه ميدانه
..................
عـگب مارد رواياها --- كسُر والحومه صفاها
جاب الماي لسكينه --- اونار العطش طفّاها
حـگها لو بـچت سكنه --- عز اوطيب راواها
عمها اوياهله ابعمها او كل صعبه يتوزمها عالعز سكنه علمها
ماشافت هضيمه اوهم --- ولاذلّت ابوجدانه
.....................
لاچن يالموالي يوم --- عاشر من گضه نحبه
الدهر كوّن على سكنه --- تـگول اوياها اله عتبه
مشتومه اومهضومه --- اومذلوله اومنسلبه
ياريت ايحضر عباس اويراها امهبطه للراس يرضه صاحب النوماس
سكنه ابحبل چتفوها --- واهدوها لبن مرجانه
--------------------------