تحن زينب اوحزن الـگلب ولمها – الرباب امن اگبلت ليها تحشمها
----------
حزنها اشتد عليها امن اگبلت ليها – الرباب ايحن طفلها ايلوع بايديها
تـگلها او تسـچب العبره اوتحاچيها – الطفل روحه افغرت والعطش عادمها

خذت منها الطفل لاچن تون وتنوح – ولبو اليمه اعتنت تمشي ابـگلب مجروح
تنادي احسين اخوها والدمع مسفوح – يبو السجاد حالة طفلك ارحمها

يـگلها الطفل رديه يبت حامي الجار – مامش رحم بـگلوب العده الفجار
تسد حتى الهوه اعليه عزمها صار – او روحه امن الحياة اتريد تحرمها

ردّت لاچن إمأيسه وگلبها انطر – او غدت بين الخيم تمشي او تتعثّر
اولن اگبل عليها الظيغم الـگصور – گمر هاشم ابـچفّه رايته زمها

صد لخته اتعثّربين المخيم – عزمه اشتد نشدها او گالها الضيغم
اشو مخطوف لونـچ والـگلب مهتم – ليش اعيونـچ اتهل روحـچ اشهمها

صاحت وين اخويه الـگصور الـگصاي – هذا طفل اخوك اظماه فت احشاي
اريدنك يبو فاضل تجيب الماي – وتروي اسا عطش گلبه يضيغمها

يـگلها ابمثل هذا اليوم تنخيني – يلوج الطفل وآنه اتفكر ابعيني
يو عمري ايخلص والموت يفنيني – يو أمرد الكوفه او دورها اهجمها