زينب والحرم لحسين --- من گامن يودعنه
وحده تسـچب العبره --- اوحده تجذب الونه
......................
إشحال احسين لمّن شاف --- زينب والحرم يمّه
زينب شــــبـچة العشره --- اوگالتلــه يــبو اليمّه
إلمن بالحرم وصّيت --- يبن سر هالأتى او عمّه
حرم نبـﮕـه ينور العين --- اوماندري الوجه لاوين
يبن فارس بدر وحنين
ادري من عـﮕب عينك --- لينه الفزع يتدنّه
.............................
او زينب نادته ابعبره --- گبل ماتنزل الميدان
ردنـــه للوطن خويه --- يـــبن الكلّم الثعــبان
نبـگه بس حرم عـﮕبك --- لمّن تهجم العدوان
منهو اليرد خيل اعداك --- يبن امي عـﮕب عيناك
ريت ارواحنه تفداك
ياهو اللي يرد الخيل --- خويه حين يلفنّه
....................
ناداها بعد هيهات --- كون ايصير المـﮕدّر
أنزل خطّة الميدان --- وأبـگه اعله الثره امعفّر
وإنتن تنسبن للشام --- كلـچن والدمـــع حـــدّر
وزينب گامت إتـگلّه --- او دمع اعيونها إتهلّه
نبـگه عـﮕبك إبذلّه
بعيالك اوبالرضعان --- خويه لاتمحنّه
......................
يبن امي علينه الـﮕوم --- لو فزعت فرد فزعه
ياهو اللي يردها اردود --- يامن للنبي فرعه
ترضه شيمتك يحسين --- گلبي اعداكم إتروعه
لو غارت عـواديــها --- منـهو الينتـهض لـيها
ولعيالك يحاميها
يلفيني يخويه الموت --- گبلك أود واتمنّه
.....................
ناده حسين يازينب --- أوصّيـچ او جرت عينه
إبخواتـچ هلّة الهلّه --- اوبالرضعان وســــكينه
يختي اوهذا المـﮕـدّر --- امن الله نازل اعلينه
ودعها اويـگللها --- يختي اودمعته ايهلها
اجمعي العايله كلها
ادري عـﮕبي العدوان --- للنسوان تتعنّه
...................
گام حسين ابو اليمّه --- عـﮕب ما ودّع اعياله
شهر سيف العزم بيده --- اولاح ابظهر الخياله
اوزينب نادت ابن امها --- اومن نادته ابياحاله
ريّضلي اوتجر حسره --- وصّتني أمّك الزهره
شمّي منحره اوصدره
لو طب كربله اولوراد --- غوجه أعله العده شنّه
.....................
حوّل من ظهر غوجه --- والزينب يحاچيها
عينـچ عالحرم عـﮕبي --- يـگللها او يمّن اعليها
والرضعان يازينب --- عـﮕب عيني تباريها
تبـگه اميتّمه حـگها --- وعليها تصعب الفرگه
يساره اتروح مرتبكه
گالتله ابوصيتك هاي --- گلبي ذاب يمـچنّه
.....................
گامت زينب اتشمّه --- ابنحره والدمع ساجم
يبن امي وتحب صدره --- اوتـگلّه يافخر هاشم
الله اوياك گالتله --- اوردّت والـگلب هايم
والنسوان شافنها --- الكل گامن تلـﮕنها
وين حسين نادنها
گالت نزل للميدان --- اوصارت بالخيم حَنّه
........................
طب ابخطّة الحومه --- اولاح ابـچفّه المـﮕدّر
ناداها المفر لاوين --- وآنه ابن الفحل حيدر
خيل اوزلم كوّرها --- اوزينب ليه تتفكر
تسمع صوت عالي الشان --- يصيح ابخطّة الميدان
آنه البالحرب حرّان
صال اوصارمه ابـچفّه --- اوبرگاب العده سَنّه
....................
لاچن عـﮕب ماللـﮕوم --- ذكرهم حرب صفين
أوچب بالحرب ينخه --- ولاواحد حصله امعين
صاب السهم دلاله --- اوطاح اعله الوطيه حسين
اوضل المهر يمّه ايحوم --- يصهل والـگلب مالوم
خايف لن تلزمه الـﮕوم
لمّن أيس من حسين --- رد لمخيّمه اتعنّه
.....................
رد لمخيمه الميمون --- لاچن بالظليمه صاح
ريحانة بني عدنان --- بموسّط العسكر طاح
زينب سمعته اوطلعت --- گالتله اودمعها ساح
ابجيتك غيّرت حالي --- اومني امردت دلالي
لفيت من الولي خالي
ابن امي مابـﮕتله روح --- جيت او أيست منّه
.........................