قلبي من ينبض...يا إسم يلفظ...حُسيناه
الله خلاني...يلهج إلساني...حُسيناه
أحسب اليوم أربعينك من قبل عام
و أنتظر يمته المواكب ترفع أعلام
ملحمة و أجمل نزال اتكتبه الأيام
معركة بين المسافة و بين الأجدام
العنده موعد وي حبيبه يرفض اينام
لو حجه دمع اشتياقه ايسكت آلالام
أركض و أمشي...أغله من كل شي...حُسيناه
بالمهد آني...يلهج إلساني...حُسيناه
تنطلق أول شرارة بدرب المصاب
يبتدي أشرف تنافس بين الأحباب
و الوصل أول هديته ايقبل الباب
زينب اتناديه أهلاً خلف الحجاب
و الوصل لحسين يمشي يحسب الحساب
البشر من تحت جدمه تاخذ اتراب
آني أتمنه...أوصل الجنة...حُسيناه
من تلقّاني...يلهج إلساني...حُسيناه
خطوة القاصد حبيبه بعد الفراق
تبني منبر للمحبة و تنضح أشواق
جنه يوم الحشر نمشي الساق بالساق
و آني كل خطوة أنادي و الله مشتاق
فرقت المحبوب صعبة اتنشف الأرياق
ما تظل الدنيه دنية ابلايه عشاق
من يرف قلبي...يكتب بدربي...حُسيناه
هذا عنواني...يلهج إلساني...حُسيناه
من أنام اعله التراب و آني مشاي
أشعر الفردوس ملكي بنومتي هاي
من تعاندني المسافة تتعب أعضاي
ألتفت حولي و أحس حسين وياي
ويه كل موكب أشوفه ايوزع الماي
يقول من تشرب يزاير يرتوي اضماي
يالردت تنصر...اشرب و اذكر...حُسيناه
هاجت أحزاني...يلهج إلساني...حُسيناه
أذّن آذان المسيرة و سارت اصفوف
اتسابق و ملهوف يركض ويه ملهوف
الصحاري اتصير وردة تنثر اطيوف
و الظلام ايصير كمرة بدرب الطفوف
حته لو ماتت أجدامي اوصل ازحوف
صرت أشوف الدنية كلها أربع احروف
طبعي عباسي...اتسّبح أنفاسي...حُسيناه
ويه وجداني...يلهج إلساني...حُسيناه
