عاهدناكم...عاهدناكم...نحيه انموت انظل وياكم
يالكاظم جيناك أفواج...انت الحج و احنه الحجاج
نحيه انموت انظل وياكم
من يوم الذر واعدناكم...و اليوم المحشر ماضين
ملتزمين ابهالميعاد...أحرار ووعد الحر دين
كل فرع ايحن لأصله و صار...أصل الناس اتراب و طين
و احنه انحن ليكم من حيث...من طينتكم مخلوقين
و اتفاخرنه...و اتفاخرنه...من فاضل طينتكم صرنه
يالدربك درب المعراج...انت الحج و احنه الحجاج
نحيه انموت انظل وياكم
من هالمبدأ أبدي الراي...خل كل الناس يسمعون
طين الشيعة امن أهل البيت...و لا بد للطينة ايحنون
خل تفهم قوم الأنذال...و البلزوار ايفجرون
لو واحد من عدنه ايموت...نقصد للكاظم مليون
ميمنعونه...ميمنعونه...لو ميت وذره ايوذرونه
رغم أتباع ابن الحجاج...انت الحج و احنه الحجاج
نحيه انموت انظل وياكم
يا كعبتنه البيها انطوف...ما نترك حجك هيهات
أعتابك حِجر إسماعيل...ميزاب الرحمة امنارات
لبيك اتعنينه ازحوف...و بصحنك جبنه الرايات
و احسبنه الراية بإحرام...و بباب القبلة الميقات
جبنه الراية...جبنه الراية...و اقصدنه الكاظم مشّاية
أمواج و تتبعها أمواج...انت الحج و احنه الحجاج
نحيه انموت انظل وياكم
محروسين بعين الله...و بحفظ الباري المنان
كل زاير شايل وياه...تربة من الطف و قرآن
لو بالدرب استشهد شاب...توقف أمه اعله الجثمان
و اتنادي مثل الحوراء...يا رب اقبل هالقربان
لا منساوم...لا منساوم...فدوه انروح الموسه الكاظم
شرفنه الباري ابهالتاج...انت الحج و احنه الحجاج
نحيه انموت انظل وياكم