أضف الموضوع
الشاعر السيد سعيد الصافي الرميثي - 17/02/2012م - 8:46 م | عدد القراء: 3193
لـو نـاوي يحسين إتروح...هاك إخذ وياك الروح
يـبـني إلمن إتريد السفر...يالقاطع إدروب الخطر
هــاك إخـــذ ويـــاك الـــروح
نـوق الـمـوادع نـوخت من ودع الليل البدر
و لاح الدمع لاح الحزن من لاحت إخيوط الفجر
و إهناك لن صوت الوفه جم دوب أظل أجرع صبر
يـا دهـر ويـه أهل الكرم ما بطلت طبع الغدر
يـا دهر ويه الأشراف...خل عندك إيصير إنصاف
ويـلاه مـنـك يا دهر...يالقاطع إدروب الخطر
هــاك إخـــذ ويـــاك الـــروح
هـالـصـوت صوت أم الوفه أم البنين أم عباس
صـاحـت يبن خير الوره يا تاج هيبه إعله الراس
يـحـسـين يبن الطاهره و إبن الوصي خير الناس
يـا هـو الـيـنـعش ريتي فقدك يخمد الأنفاس
يـبن البتول أمشي إوياك...و اعليه يصعب فرقاك
لو رحت أموت من القهر...يالقاطع إدروب الخطر
هــاك إخـــذ ويـــاك الـــروح
يـحـسـيـن عندي إمودعك والدك حماي الحمه
و الأمـك إشـعـندي عذر و إنت وديعة فاطمه
يـولـيـدي لـو عني رحت حيلي العليه إتهدمه
مـا تـقـطـع إعـيوني الدمع لمن يوافيها العمه
أتمنه ما عندي أنظار...و لا شفت ضعنك من سار
و لا يـبقه مشبوح النظر...يالقاطع إدروب الخطر
هــاك إخـــذ ويـــاك الـــروح
صـاحـت يـسبع القنطره يا قمر هاشم يا شهم
أمـك إبـيـوم الجابتك يا با الفضل شافت حلم
إنـت جـفـيـل الـعايله و إبهالخبر عندك علم
سـاقـي العطاشه إبكربله من إخيالك إتخاف الزلم
و حـان الوعد يا عباس...إشرايك يراعي النوماس
مـا ظـن تـقصر يا قمر...يالقاطع إدروب الخطر
هــاك إخـــذ ويـــاك الـــروح
أمـك يـوفـاي الـعهد ما أنصف إوياها الزمن
بـعيوني يوليدي شفت جرح الوصي و جبد الحسن
و الأكـلف إعليه و أشد لمن حده حادي الضعن
طـلعت الروح من الجسد حين الطلعتوا من الوطن
يـولـيـدي يا نور العين ...ودعت بحماك حسين
و إنت الإله إحزام الظهر...يالقاطع إدروب الخطر
هــاك إخـــذ ويـــاك الـــروح
سـلـوتـي و سـباح القلب سلمته يبني إبيمنتك
زيـنـب وديـعـة حـيدره هاي العقيله الربتك
قـابلت مهدك من زغر و ما غفت ساعه و عافتك
قـلت إلها قومي إبشيمتي و زينب يخوها إبشيمتك
يـبـني الدرب خاف إبعيد...تتفقد إختك شتريد
بـاريـها يا راعي الفخر...يالقاطع إدروب الخطر
هــاك إخـــذ ويـــاك الـــروح |
|
