أضف الموضوع
درر من نحر
الشاعر هيثم سعّودي الكربلائي - 13/03/2009م - 1:34 م | عدد القراء: 3522
هـذا احـسـيـن شنهو تعرف عنّه .... نار اتريد لو رايد الجنّه
هـوّه ايريد منّك .... وانته اتريد منّه .... نار اتريد لو رايد الجنّه
* * *
هـذا احـسـين أعرضلك صفاته .... وانثرلك درر من بحر ذاته
عـزّه او شـيـمته او عزمه او ثباته .... ترسملك معالم تضحياته
ابـهـاي الروح توّج معطياته .... من طب كربله او ضحّه ابحياته
ضـحّـه ابكل كيانه الدين جدّه .... رادك تلتزم وتصون حدّه
هـوّه ايريد منّك .... وانته اتريد منّه .... نار اتريد لو رايد الجنّه
* * *
هـذا احـسـين يالتعرف مقامه .... انقل صورته ابأرض الكرامه
راد ايـصـلّـي وابـحين الاءقامه .... شاف الاجل بانتله علامه
يـدري الاجـل ما تخطي سهامه .... لاچن غايته اتوضّح مرامه
رادك لـحـظه ما تنسه صلاتك .... حتّه لو تكلفك كل حياتك
هـوّه ايريد منّك .... وانته اتريد منّه .... نار اتريد لو رايد الجنّه
* * *
هـذا احـسين أرسملك اءبائه .... واعرضلك شموخه او كبريائه
ساحات الشرف تعرف عطائه .... او تعرف عِفّته او طهره او نقائه
مـحـزوز النحر تنزف دمائه .... او عينه بگت مشبوحه النسائه
لاخـر لـحـظه ما غمّضت عينه .... ظلّت تحرس اعياله او بنينه
هـوّه ايريد منّك .... وانته اتريد منّه .... نار اتريد لو رايد الجنّه
* * *
هـذا احسين ياللّي اعرفت قدره .... انظرله اباءبه او دقّق النظره
بـالـطـف ما وگع ضنوة الزهره .... لاچنّه ركع يغرس البذره
او هالبذره احملت عنصر الثوره .... او لازم تنسگي بدموم نحره
لـتـنـظره جسد بارض الكرامه .... راسه المرتفع جسّد مقامه
هـوّه ايريد منّك .... وانته اتريد منّه .... نار اتريد لو رايد الجنّه
* * *
او شـان الـيـوصـل النقطة كماله .... يحضه ابمقربة ربّه تعاله
مـثـل الهادي من كِملت خصاله .... عرّج يم عرش ربّه او دناله
او راس احـسين رمح الغدر شاله .... لتسمّيه گمر وتحيطه هاله
لا مـو گمـر طـالع من بروجه .... هذا المصطفه ابحالة عروجه
هـوّه ايريد منّك .... وانته اتريد منّه .... نار اتريد لو رايد الجنّه
* * *
لـجـل احسين لو وسّمت صدرك .... اعرف غايته يرتفع قدرك
دمـع او لـطـم بالضامي يذكرك .... مثله احسم ابدنياك أمرك
اتـريـد احسين بالمحشر يحضرك .... ايريدك تفني للمعبود عمرك
اءنـتـه اتريد من عنده الشفاعه .... هوّه ايرد من عندك الطّاعه
هـوّه ايريد منّك .... وانته اتريد منّه .... نار اتريد لو رايد الجنّه |
(1998)
|
