دمعة أحبابك...طاحت ببابك...و انت كل طبعك هله

يا قمر نطلب حوائجنه إجينه...ما نرد إلا و هدايانا بيدينه

انت باب الله الفلا ينسد علينه...ها يبو الغيرة تره ببابك بجينه

احنه أنصارك...احنه زوارك...و انت حارس كربله

ما ترد ضيفك يسبع الغاضرية...يا غيور انحلفك بدمع السبية

نقره يم بابك شعار الرافضية...للأبد و الله ما ننسه الزجية

يحجي مدمعنه...وانت تسمعنه...يالتحل المسألة

إيدي مرفوعة يبو الجود و قصدتك...و الدعه مقبول مولاي بحضرتك

ما يرد مهموم خطارك عرفتك...أقسم اعليك ابرقية و زينب أختك

سيدي نظرة...و احنه بالحضرة...حاير و مسني البله

أقسم اعليك بعلي و بالزهرة أمك...تقضي حاجات الإجو هالليلة يمك

احنه عشاقك تره و نتباهه بإسمك...حته لو مات الهوه نقدر نشمك

ندري مولانه...حاضر اويانه...و الدمع يمك حِله

نظرة المحتاج تفهمها الغيارة...ما كو داعي للشرح تكفي الإشارة

مدت الشباجك اجفوف الحيارة...يالله يا عباس انطينه البشارة

بادي معروفك...و احنه منعوفك...بالصحن صوتي اعلته

انت يمك ما كو صعبة مستحيلة...يا بو فاضل غيركم ما نشتكي له

جم عليل ابحضرتك وشجم عليلة...جم شخص محتار و المدمع يسيله

لا ترجعنه...وي مواجعنه...و المدامع هاملة

سيدي هاي الأيادي الحيدرية...تستحق نظرة و عطف يا بو الحمية

امروتك يا بو المروة الهاشمية...بالعليل انحلفك ابهاي المسية

كلها محتاجه...تتطلب الحاجة...انت راعي المسألة