أضف الموضوع
الشاعر الأديب الحاج جابر الكاظمي - 06/06/2015م - 6:51 م | عدد القراء: 2971
يا بحر الكرم...ويه الأمم...بإسمك نحاجج
ما خاب الوفد...و اللي قصد...باب الحوائج
و الأسرار الخفيه...بربوع الكاظميه...باب الحوائج
يا الكاظم إلك باري العرش خصص كرامه
دين المصطفه ربك جعل بيدك زمامه
من فارس مضر بيك اتصل حب الإمامه
صبرك بالسجن زال و كشف وحشة ظلامه
مثل المرتضه...يا بو الرضه...جانت حياتك
من جدك علي...ذاك الولي...وارث صفاتك
الصفات الحيدريه...بربوع الكاظميه...باب الحوائج
انت الجوهرة و بين الصدف خلاها خصمك
وحدك بالسجن بس الحزن و اللوعة يمك
للغيظ اكظمت يالكاظم ومن اسمك
يا وارث مصابك من مصاب الزهره أمك
من قعر السجن...صرخة حزن...صوتك علنها
روحك حايمه...و من فاطمه...ورثة حزنها
المآسي الفاطيمه...بربوع الكاظميه...باب الحوائج
يا راهب بني هاشم يمن واضح سبيلك
ما صابر صبر صبرك و لا زاهد مثيلك
مثل المجتبه سم الغدر قطّع دليلك
و أملاك العرش ناحت إلك ساعة رحيلك
جابهت المحن...مثل الحسن...يبن الأكارم
جلّت محنتك...و بجبدتك...سم الأراقم
هتف ناعي المنيه...بربوع الكاظميه...باب الحوائج
يوسف بالسجن ما شاهد الهم الحملته
أيوب النبي ما ظن صبر صبر الصبرته
يا وارث حزن جدك أبو اليمه و غربته
يالسمّك مثل سهم الذي نثّر جبدته
روحك بالغرب...حملت رعب...لوعة دهرها
نيران الألم ...مثل الخيم ...يسعر جمرها
مصاب الغاضريه...بربوع الكاظميه...باب الحوائج
جينه الدفنتك يا سيدي يمك هتفنه
احنه شيعتك هالليله يم نعشك وقفنه
بس جدك وسف محد حضر يمه و يدفنه
اتغسل بالدمه و محد إجه ايغسله و يجفنه
يا سابع بدر...يم الجسر...ليك اعتنينه
احنه شيعتك...و الدفنتك...يمك اجينه
اندفن بدر الثريه...بربوع الكاظميه...باب الحوائج
موضع مرقدك هاي الأرض ربك جعلها
صارت شيعتك من كل مهب تتوافد إلها
يالقبرك صبح لهل الشدد كعبة أملها
كل شده التمر كل معضله بفضلك تحلها
يا باب الفرج... قلبي لهج... بيك و تحسر
لو طحت ابشدد... عندي السند... موسه بن جعفر
سند قبرك إليه...بربوع الكاظميه...باب الحوائج
جينه الحضرتك يا سيدي انأدي الزياره
منك نلتمس يبن الطهر هاي البشاره
نتمنه الفرج و المنتظر يبزغ نهاره
شبل العسكري الحكم الظلم يعلن دماره
بالمهدي الأمل...و الكل...سأل ربنه بدعاءه
يا رب البشر...للمنتظر...حقق رجاءه
بدعاء أرفع إديّه...بربوع الكاظميه...باب الحوائج |
|
